MNF General Secretary Er. K Lalsawmvela chuan, Motor neituten kawng chhe lutuk vangin Silchar-Aizawl kawng oil leh bungrua an phurh  duh loh vangin ni engemawti chhung chu harsatna kan tawh phah a. CYMA hial che chhuakin, “a hun taka kawng siamtha tura an ngenna a sawt loh avanga hetiang thleng hi kan ni,” tiin an au chhuak ta a. Drivers Association hotute pawhin, “Kan kawng chhiat chhan chu Sawrkar dinglai inthlahdah vang liau liau a ni” tiin an au chuak hial bawk a. Chu mai ni lovin, kawng chhiat lutuk vangin Sawrkar zawkin kawng a khar hial hi thil thleng ngailo niin a lang, a ti.

A bikin Kawnpui leh Khamrang inkar kawng chhiat  chungchangah, kan Chief Minister chuan MCS Khawmpui hma a a thusawiah chuan, “He kawng hi Sadguru thawh a ni a, an liability nakuma tawp tur a ni.  Kum 5 chhung maintain nan nuai 12 agreement- ah ziah a ni, engtinnge kum 5 chhung nuai 12 in an repair theih ang ? Khatiang agreement kha a ni kan sign pui thin.  Sawrkar chan chhe sa ranin, contractor duhsak sa ranin, hlawkna chu  tem ve, chan tlan duhna avangin, contractor lamah officer tam tak kan tang thin, hei hi tawp rawh se; kan Sawrkar hnuah contractor hamthatna rawngkai agreement siam an awm chuan action kan la dawn, hei hi a tawp hmak tur a ni” tiin a sawi a. A video pawh hmuh theihin a awm a. Pu Duha hi ‘Opposition emaw a la inti a mawni chu aw’ tih turin, Paberin a hnuaia officer te thil awmdan zawt chiang hmasa lova, Engineer ho rilru tina zawnga hetiang a sawi mai hi a pawi ka ti hle a. State Service pakhat kalkhawm hmaah service dang officer te hetianga hotupa berin a sawisel hi thil tih awm loh tak a niin, a hmain lo zawt chiang se, thil awmdan hrechiang seng chuan tiang hian a sawi ka ring lo. A sawitu hi hetiang sawi tur hian a inhmehlo ka ti hle a ni, K. Lalsawmvela chuan a ti.

Engineer- In- Chief(PWD) hlui chuan, kan CM hian Opposition hotu anih lai khan “Kawng thalo lutuk hi ZPM a Sawrkar ruala tihbo kan tum a ni”a tih chu Video pawh a la awm reng a. Thla 9 hmel a Sawrkar-in a hmu ta a, kawng thalo chu a tibo ta em tih chu mipui chhan tur ni se.  Kumina kan kawng chhiat nasat em em chhan hi eng dang vang ni lovin, thal chhunga repair/maintenance tih loh vang liau liau a ni. November-April chhung hian kum dangah chuan sum awm ang angin PWD hian khawpui leh kawng dang pawh an repair thin kha a ni a. Kumin hi chuan sum neih loh vang nge hmun hrang hrangah repair hmuh tur a tlem hle a. Kawng hi tha reng tura ngaih tur chu a ni lova; fur a zawh meuh chuan a chhe lai siam tur engemawzat a awm ziah thin a. Kumin hian thal laia a hun taka repair chu nise tun ang hun hi chu pumpelh theih ngei tur a ni. Sawrkar thar honeymoon hmang rei,  inthlahdah vang ni ngeiin a lang. Sawrkar liamta in SEDP atana Rs.150 Crores a dah hman lohva a hnutchhiah  atanga thlai lei nana  D A H hman leh si loh Rs.110 Crores leh, nikum  SASCI  first intalment atan a Central-in Rs.  260 Crore emaw lai a pek, a nihna tura hman si loh a dah that, kumin June a pek chhuah chauh te kha kawngpui repair nan hian lo hmang chu ni se, heng harsatna lian tak leh Aizawl khawpui khuar tam lutuk hi chu pumpelh theih a ni ngei ang, a ti bawk.

Er. K Lalsawmvela chuan Kawng chhe chungchang leh contract hna chungchanga thil awmdan tlangpui chu hetiang hian a sawi:

Kan CM hian opposition anih lai khan, “kan Sawrkar hunah chuan contract hna reng reng EPC mode veka tih a ni ang” tih a sawi thin a. EPC mode hi NH atan chuan State PWD hian 2018 atang khan a lo hmang daih tawh a. An Sawrkar hnua tender Department pali a mite chu EPC mode hman lohna vek an ni thung. Tun a mi, Kawnpui-Khamrang (Km.118-133) pawh hi a kawng neitu leh sum petu Ministry of Road Transport & Highways (MoRT&H) duhdan a EPC mode contract a niin, tender document leh Contract Agreement pawh EPC kalphung ang takin kalpui a ni; PWD hian dan an bawhchhiatna a awm lo.

State PWD hian an duh danin contract document hi an ti danglam ngai lova. MoRT&H standard document hi an hmang mai thin a. Kawnpui-Khamrang bik Defect liability period chhunga maintenance atana pawisa dah (1% of contract agreement amount of Rs.1178 lakhs) = Rs.11.78 lakhs  pawh hi EPC guideline ang chiah a ni a; contractor duhsak vang emaw, hlawkna  tem ve a, chan  ve duh vang emaw a he agreement hi PWD officer te hian ziak an ni lo tih hi ka sawi chiang duh a ni.

EPC mode of contract-ah hian Defect liability/maintenance hun chhung hi hna a zirin kum 10 te, kum 5 leh kum 3 a awm a; hengah hian maintenance atana pawisa dah tur zat Central sawrkar hian a tuk sa vek a. (kum 10 atan 5%, kum 5 atan 2.5%, kum 3 atan 1%). Kawnpui-Khamrang kawng bik hi chu hna thar/kawng thar diai (original work) ni lovin, a khat tawka siam that (Periodical Renewal) mai anih avangin defect liability period hi, CM-in a sawi ang  a kum 5 ni lovin  kum 3 a ni nghe nghe a. He kawng hna thawktu Sadguru Engineers & Allied Services Pvt.Ltd hi tihluihnaa Ban (terminate) ni lovin, MoRT&H hotute hriatpuina a contract agreement zulzuiin, Contractor-in thubuai (dispute) a thehluh hnukdawkin, a security Rs.35.37 lakhs PWD ah pe in maintenance mawhphurhna chu hlihsak (foreclose) a ni zawk.

MNF Sawrkar hlim khan Aizawl-Silchar kawng  leh kawng dang tamtak kha a chhe hle mai a. Sawrkar hmasa puhmawha hun khawhral kha tullo tiin, Chief Minister Pu Zoramthanga chuan 2018 Krismas ruai theh tukah Buichali lam panin, PWD leh kawng enkawltu Contractor te ko khawmin hma a la nghal char char a. Central kawng leh an suma siam tur ni mahse, a tuartu Mizoram mipui kan nih avangin State sum neih ang angin, sanction nghak kher lova thawk nghal turin a ti a. He kawng bakah kawng dang pawh tlawh kualin, Congress Sawrkar-in pawisa an hnutchhiah ang ang kha kawng siamthat nan a hmang char char a. A hnuah heng kawngte hi tlawh kual lehin theihtawp a chhuah vangin kawng chhe zual chu reilote ah siamthat a ni a. 

A hnua Covid-in min nuai chung pawhin kum 5 chhung khan tun anga kawng chhe lutuk awm lovin kan awm thei a. Tun Sawrkar hi chuan thal laia muthluin, furah kawng nasa taka a chhiat hnuah "Fur ruah tui tam laiin kawng a repair theih loh”an ti ta mai a. Tin, Silchar kawng pawh State mawhphurhna a ni lo, NHIDCL mawhphurhna a ni’ ti mai lovin, kawng a chhiat miau chuan a tuartu mipui kan nih avangin a tawpa mawhphurhna latu chu State Sawrkar neitu a ni tih hi pawm a, nakin zelah pawh mawhphurhna la ngamlo ang ziazanga midang puhmawh tur zawng zawng lova a hun taka tan la turin kan Sawrkar hi ka ngen a ni.

Tunah hian Aizawl bypass on the western side chu, MNF Sawrkar laia ruahman felsa diam angin, Ministry of DoNER atanga sanction  Rs.500 Crore vel hmuin, Central Sawrkar thu ang in, kawng pumpui Km 45 vel lai chu then darh phal lovin, contractor pakhat thawh turin tender chhuah mek a ni a. Hei pawh hi EPC mode a tender chhuah a niin, agreement pawh MoRT&H-in EPC Contract document a ruahmansa ang bawkin ziah leh tur a ni ang a. Pawisa hi Central lam tum anih avangin, maintenance fund pawh defect liability chhung  atan MDoNER  tum vek tur a ni a. Defect liability period kum 5 chhunga maintenance pawisa tam zawk contractor-in a neih a, tha taka a enkawl  theih nan, EPC mode dan zawm a  contract agreement ziaktu officer-in, CM vau lawk anga hrem (action lak)  a tawh loh nan, kan CM zahawm tak, Finance Minister ni  bawk hian State budget atangin sum thahnem tak ruahman sak ngei turin ka ngen a ni.

Sawrkar inthlahdah vang liau liau a kan kawngpui chhe ta lutuk hi a pawi takzet a. Thal chhunga repair hna thawk lova, kawng hmangtu trucker leh NGO ten a hun laia repair tura an ngen lawm lawmna hre reng chunga mipuite min ngaihthah hi a demawm tak zet a ni. Kawng chhiat vanga mipui sum kan hloh zozai min pelet tur hian, mipui hmuha langsar taka sual sim tum an nih an inlantir ang khan, sawi ringawt lovin a takin thawk mawlh rawh se.

Vawiin thuthar thehdarhtute a kawmna ah hian MNF Publicity Board hruaitute’n an ṭawiawm a ni.

Kawng a chhia emaw, a tha emaw, midang mawhpuh tum lova, ram enkawl tura mipuiin an kuta kan dah an nih angin, mawhphurhna la ngam Sawrkar kan mamawh tak zet a. Midang dem ran chunga thusawi reng mai CM kan nei hi a vanduai thlak tak zet  a. Sawrkar fawng chelh tura mipui hma a an thutiam leh inzawrhna zozai kha Zoram mipui hian kan la theihnghilh lova. Mitinin kan phone hmangin kheuh chhuah theihin kan kutah an la inchhawp vek tih hi hre mawlh tur leh, Sum puk leh mipui chhiah/sum khawn an huaisen ang hian, an enkawl mek Mizoram chhiat leh thatah hian mawh la ngam ngei tawh turin ZPM Sawrkar kaihruaitu Chief  Minister leh a thuihruaite hi kan chah tak meuh meuh a ni, a ti bawk.